Innu

 
Eshe, nitshitimatshishitan tapue neme ua aitiat. Natamik^u ne nitaitinan.  
 
Tshietshishepaushit, nasht apu mitshishuiat, peik^u muk^u pineu tapan. Eukuan ma ne : « Nika ui tshituten », iu ninapem, at nitshitaimuau. Mauat ! Apu tapuetak, apu tepenimut. Ekue tapuetuk tshek. Ekue tshitutet, mishta-katak^u.  
 
Katshi nishutipishkat, nanitam ninatshi-shatshuapaten kushkana, apu tshi nipaitshiht nameshat. Nitanishat, (Matinen mak Shunien), apishissishuat. Eukuan ma ne etiat, nasht shikatshuat etishukau nete tuashkam tshetshi nanitam tshituteht.  
 
Shash nitakushin, nika minuinniun! Iapit ninikuten, iapit nituten mita. Nimamituneniten neme tshe aitian, tshe ut tshi inniuian. Nasht kuetu nitaitin. Nipatshitinitshen at tshetshi nakapanit. Mauat ! Tshipa tshi a tutakanu ? Ekue mamitunenitaman. Nisht^u anameshikananissa ekue patshitinitsheian tshetshi uenashk tutaman ne ua tutaman : tshetshi minuinniuian.  
 
Eukuannu shakatshiht nitanishat, eukuannu miaht, ek^u nin iapit apu maian. Ekue tshitishukau, nipishapunu niminiauat. Ekue tshituteht. Eukuan nin niataman miush, atshiku-miush ishinikatepan, eukuan iapikunikau, innitsheuauat anite tapanat. Eukuan e aiamiaian.  
 
Shash kassinu tshekuan nitaieshkushtan : takukuman, sheshtakuiapi. Shash kassinu ka-nuauitamakunaua tshe aitian kie nasht apu tshekuan itenitaman kie apu shetshishian. Tamien muk^u nishupipuneshu, nete mita nititashtauan eshkuashkushit, nete aku e tshitsheianit, apu ne ishpish tshi papamuteian, muk^u nenu tshetshi eka uapamit. Ekue kutueian mashten. Ashkashkuat nikutueuatshen. Apu tshi natuapataman pashteu-mita, katak^u anite takuana.  
 
Eukuan uieuetashtaian matshi-apakuai, takukuman, anite tshe atusseian, tshe akushian. Nasht apu kanuenitaman matshunish kie mitshim. Kassinu nitishi-nekatshiun. Miam etati Auen etusseshtut ! Takuan uin ! tau Tshishe-Manitu. Eukuan ma ne etusseian, eukuan naui uet tepuet Tamien : «Nika, tshitaiamian a ?» Mueu enuet pakueshikan. Apu auat natutuk, shash utitshipanu. Muk^u peikuau nimishta-tepuen : «Nika tshitshitua Mani, matakushku !»  
 
Ekue tshi tutaman ne nitatusseun, muk^u pushkutipaikan nitatussenatshe anite. Kassinu ka-nuauitshikunaua eukuan etenitaman. Ekue neme pimutatshimuian, shiutakan ninatuapaten anite nititshit tshetshi ashtaian.  
 
Eukuan tutakanipan ueshkat. Eukuan ma ne, nasht nipapin katshi ne tshishi-aitian. Eukuan ma shiatshuapian, apitu pet tauat nitanishat, takushinuat. Tan tshe itakau ? Anite ushtashkuashk^u miam auass patutepitati eukuan eshinakuak nemenu tshe uapatahk pet takushinitaui. Apu petakushit nitauassim, napess nana. Eukuannu ma pietuaht e aiashikueniti. Ma ! Petamuat tshekuannu : «Nika, tshekuan ne eteuemakak ?» Ekue uapatanikau. Auennua nenua musheshkateshinua !  
 
Tanishipani nenua innua netuapamat. Tshekat nipu. Ninan kie ute, nipitakue, nipa nipitan eka innuat uapamitshitakuenit.  
 

* * * / * * *